ԱՎԱԶԱԿԱՊԵՏՈՒԹՅԱՆ ՊԱՐԱԳԼՈՒԽՆԵՐԻ

ՄԻ ՔԱՆԻ ՏՆՏԵՍԱԿԱՆ ՀԱՆՑԱԳՈՐԾՈՒԹՅՈՒՆՆԵՐ

Վերջին ամիսներին Ռոբերտ Քոչարյանի եւ Սերժ Սարգսյանի գլխավորած հանցավոր վարչախմբին ներկայացվել են քաղաքական‚ քրեական‚ տնտեսական բնույթի բազմաթիվ կոնկրետ մեղադրանքներ։ Դրանցից եւ ոչ մեկին նրանք ըստ էության չեն պատասխանել ու չեն կարողացել հերքել։ Ստորեւ ներկայացվում է նրանց կատարած տնտեսական հանցագործությունների մի շարք։ Սա լրիվ ցանկը չէ‚ այլ ամբողջի հազիվ 10%-ը։ Սակայն այսքանն էլ բավարար է համոզվելու համար‚ որ նրանք մեր երկրին ու ժողովրդին վերաբերվում են շատ ավելի վատ‚ քան անգամ միջնադարյան որեւէ օտար բռնակալ։

1.      «Հայռուսգազարդ» բաժնետիրական ընկերությունը հիմնադրվել է 1997թ.։ Ռուսական կողմն իր 55 % մասնաբաժինը պետք է վճարեր գազով‚ որը 4 տարի ձրի ստանալու էր Հայաստանը։ Ներկա իշխանություններն այդ գազաքանակը ընդամենը երկու տարում՝ 1998-1999 թթ. վաճառեցին բնակչությանը եւ մեծ չափով՝ ձեռնարկություններին։ Վաճառքից գոյացած 148 միլիոն դոլարը ո՛չ բյուջե‚ ո՛չ այլ որեւէ հաշիվ մուտք չի արվել‚ եւ դրա մասին մինչեւ այսօր ոչ մեկը բացատրություն չի տվել։ Այդ գումարը «կորել է».... այսինքն՝ ամբողջությամբ գրպանվել է։

2.      2006թ. Ղազախստանից Հայաստան է ներկրվել 1 միլիարդ 200 միլիոն խորանարդ մետր գազ‚ որի արժեքը կազմում է 157 միլիոն դոլար։ Այս ներկրումը կատարվել է առանց որեւէ ձեւակերպման‚ այսպես ասած՝ «լեւի»‚ դրա մասին Հայաստանի վիճակագրական պաշտոնագրերում  ոչ մի խոսք չկա։ Մինչդեռ դա արձանագրված է Ղազախստանի պաշտոնական վիճակագրության մեջ։ Բնականաբար‚ ոչ մի տեղ չի երեւում նաեւ դրա վաճառքից գոյացած 157 միլիոն դոլար գումարի ճակատագիրը։

3.      Դեռ 1997 թ. աշնանը Հայաստան էր ներկրվում ամսական 30.000 տոննա բենզին։ 2002 թ. ի վեր Հայաստան մտնող բենզինի քանակը ներկայացվում է ամսական 12.000-15.000 տոննա։ Ավտոմեքենաների թվի հսկայական աճի պայմաններում սա անհասկանալի է։ Իրականում Հայաստան է ներկրվում նշված թվից 4-5 անգամ ավելի՝ 50-60 հազար տոննա բենզին։ Այսինքն՝ վերջին 6 տարվա ընթացքում Հայաստան է ներկրվել շուրջ մեկ միլիոն տոննա հավելյալ բենզին‚ որը չի հարկվել։ Դրա հետեւանքով պետական բյուջեն կորցրել է մոտ 400 միլիոն դոլար‚ որը նույնպես գրպանվել է։

4.      Զանգեզուրի պղնձամոլիբդենային կոմբինատը սեփականաշնորհվել է 132 միլիոն դոլարով։ Բայց գնորդը վճարը միանգամից չի տվել‚ մուծումը հետաձգվել է երեք տարով։ Ճիշտ այդքան՝ 132 միլիոն դոլար է կազմում այս կոմբինատի միայն 6 ամսվա շահույթը։ Այսինքն՝ գնորդը վաճառքի պահին կոմբինատն ստացել է ձրի‚ իսկ 132 միլիոն դոլարը‚ որ պետք է վճարի‚ 15 անգամ ավելի պակաս է կոմբինատի իրական‚ շուկայական գնից։

5.      Հայկական Էլեկտրացանցերը 2002 թ. վաճառվել են 12 միլիոն դոլարով։ Կարճ ժամանակ հետո նույն այդ ցանցերը վերավաճառվել են 80 միլիոն դոլարով։ Այսինքն՝ ժամանակին այն վաճառվել իր շուկայական գնից 6-7 անգամ ցածր գնով‚ իսկ վերավաճառողն ստացել է 68 միլիոն դոլար շահույթ։

6.      Հայխնայբանկը վաճառվել է ընդամենը 400 հազար դոլարով՝ իր շուկայական գնից 60 անգամ էժան‚ իսկ 3 տարի հետո այն վերավաճառվել է 25 միլիոն դոլարով։

7.      «Արմավիա» ընկերությունը ստեղծվել է ձրիաբար‚ առանց մի կոպեկ ներդրման‚ ապա նրան է փոխանցվել «Հայկական ավիաուղիների» տարեկան մեկ միլիոն ուղեւորաշրջանառությունը։ Դրա հետեւանքով պետությանը հասցվել է 400 միլիոն դոլարի վնաս։

8.      «Արդշինինվեստբանկը» ստեղծվել է «Արդշինբանկը» եւ «Հայագրոբանկը» կանխամտածված սնանկացնելու‚ պարտքերն ու պարտավորությունները պետական պահուստների հաշվին դուրս գրելու միջոցով։ Ապա այն շուկայականից ավելի քան 20 անգամ էժան վաճառվել է  Քոչարյանի մի մտերիմի։

9.      «Արարատցեմենտը» շուկայական գնով ձեռք բերելու հայտ էր ներկայացրել շվեյցարական մի ընկերություն‚ սակայն նրան մերժեցին‚ եւ այն վաճառվեց տեղական գործարարի՝ 10 անգամ ցածր գնով։

10.               «Սուրբ Աստվածամայր» հսկայական հիվանդանոցային համալիրը 2007թ. ընդամենը 210 միլիոն դրամով վաճառվել է «Լեբեն» ընկերությանը‚ այն դեպքում‚ երբ դրա իրական արժեքը 1.5 միլիարդ դրամ է։

11.               Սանկտ Պետերբուրգի կենտրոնում գտնվող «Արարատ» կոնյակի գործարանը իր 12.000 ք. մ. տարածքով վաճառվել է ընդամենը 300.000 դոլարով։ Գործարանը չհաշված‚ այդքան գումար արժե Սանկտ-Պետերբուրգի կենտրոնում ընդամենը մի քանի հարյուր քառակուսի մետր հողը։

12.               «Լեչկոմիսիա» կոչված հիվանդանոցը վաճառվել է ընդամենը 180 հազար դոլարով‚ ավելի էժան‚ քան նույն տարածքում երեք սենյականոց սովորական բնակարանը։

Սրանք այն տնտեսական հանցագործություններից են‚ որոնց թիկունքում անմիջապես կանգնած են անձամբ Ռ. Քոչարյանը եւ Սերժ Սարգսյանը‚ այսինքն՝ գողացված ու կողոպտված հարյուր միլիոնավոր դոլարները նրանք են գրպանել‚ իսկ գույքին նրանք են տիրացել։ Ընդհանրապես‚ նրանց ստեղծած ու գլխավորած կոռուպցիոն բուրգը այս տարիներին թալանել է շուրջ չորս միլիարդ դոլար։